A praza faise accesible e salva a pendente do terreo con catro plataformas que despois das obras minimizan o impacto visual da presenza dos muros de formigón ao rebaixar o seu nivel. Na primeira plataforma instalouse o parque infantil adaptado e nas outras tres creáronse zonas verdes e bancos corredizos para o descanso, que fan de soporte a toda a zona verde con especies arbustivas e arbóreas que crean un espazo de cor que dará sombra en canto medren as árbores.

“Esta praza levaba tempo en desuso e coa proximidade dos centros escolares e das instalacións deportivas da contorna pareceunos importante transformar esta zona nun espazo polivalente, que incluira un parque infantil e creara áreas verdes con sombra para o descanso da xente, principalmente das persoas que viven alí”, explica o alcalde do Concello de Chantada, Manuel Lorenzo Varela.

Praza Luis García Arias / Segundo Navaza

Precisamente, que solución se lle daba a este espazo era unha inquedanza que tiña trasladado a veciñanza ao equipo de goberno. Unha vez rematada a obra aseguran estar satisfeitos, “A obra presentaba as súas complexidades, tanto na súa execución como nos usos finais, pero as persoas que viven na zona trasládannos que están moi satisfeitas coa humanización que vimos de facer, un espazo aberto, verde, accesible e funcional”, asegura o rexedor.

A área de Infraestruturas Urbanas do Concello de Chantada segue así coa recuperación de espazos e prazas que estaban desaproveitadas para crear zonas agradables para o lecer. Para o vindeiro ano anúncianse dúas importantes obras no casco urbano para habilitar máis superficies para o contacto coa natureza e o descanso.