Interior Galego Vivo asegura que a N-540 conta con varios tramos totalmente degradados e require unha actuación integral, “a comezar pola comarca de Chantada e polo termo municipal de Portomarín”. Canto á N-120, consideran que o peor tramo é o que transcorre entre o concello de Quiroga e o alto da Guítara, xa no termo municipal de Pantón.
A solicitude, asinada polo coordinador xeral do movemento, Antom Fente Parada, lembra que xa en 2023 e 2024 se trasladou ao Ministerio o estado “lamentábel e recorrente” da N-540. Naquel momento indicóuselles que existían proxectos prioritarios con máis de 13 millóns de euros previstos para 2023, “esas actuacións non se materializaron e a estrada presenta hoxe un estado máis calamitoso ca nunca”.
O colectivo sinala que en 2024 apenas se executaron 200.000 euros en actuacións que se limitaron a parcheos, mentres que o recente tren de borrascas provocou o colapso do firme en numerosos treitos, con fochancas de grande dimensión, problemas de drenaxe e marxes sen mantemento. Con todo solicitan unha modificación inmediata da actual licitación da N-540, “xa que o propio expediente recoñece a insuficiencia dos 10 millóns de euros previstos (sen IVE) para os 60 quilómetros afectados”.
Así Interior Galego Vivo reclama coas súas solicitudes:
- A reparación integral inmediata da N-540 e da N-120, sen demoras máis alá do primeiro semestre de 2026.
- A modificación da licitación da N-540, incrementando o orzamento e adiantando a 2026 as partidas previstas para 2027, atendendo á insuficiencia recoñecida do investimento actual.
- A ampliación e modernización estrutural da N-540, cun pavimento acorde ao tráfico e tonelaxe, mellora e ampliación da malla cinexética, carrís de adiantamento continuos e planificación dun corredor ferroviario paralelo que reforce a conectividade sustentábel da Galiza interior.
Interior Galego Vivo advirte de que a situación actual supón un risco permanente para milleiros de persoas usuarias e un freo ao desenvolvemento económico das comarcas de Chantada, Lemos e Quiroga, e reclama ao Ministerio “feitos inmediatos e non máis promesas” para garantir unhas comunicacións seguras e dignas no interior galego.
