O Concello de Castro Caldelas celebra o ‘Día Internacional da Muller’ este venres, 6 de marzo. Farao ás 12:00 h. cunha homenaxe moi especial na que terá protagonismo un acto simbólico: Descubrir unha fermosa obra feita en gancho polas mulleres da Asociación de Xubilad@s do concello.

IV PREMIO DA MULLER TRABALLADORA E MANIFESTO

Trátase duns premios creados para homenaxear á muller caldelá. O primeiro Premio foi entregado a unha Caldelá do rural: Esperanza Gómez, de Quintela de Mazaira.; o segundo Premio foi entregado a unha Caldelá da vila: Lola do “Restaurante Pallón II”; o terceiro a outra Caldelá do rural: Rita de “Casa Rita” de Sas de Penelas. 

O IV Premio será entregado este 6 de marzo ás 12:15 h. a unha muller moi significativa da vila, cuxa identidade se desvelará no propio acto.

Como remate ao acto terá lugar a lectura do Manifesto.

“Con este acto ponderamos o papel das mulleres, moi especialmente as mulleres Caldelás: mulleres bravas, intelixentes, traballadoras, … a través de tantas xeracións e profesións. En cada premiada simbolizamos a loita e a resiliencia histórica, destacando o seu papel fundamental no coidado dos fillos, dos maiores, dos traballos realizados para sacar adiante as empresas das que case nunca eran titulares, do duro traballo do campo e como motores da economía familiar”, refire a súa alcaldesa Sara Inés Vega.

A alcaldesa aproveita tamén para dar as grazas ás Mulleres da Asociación de Xubilad@s, que un ano máis traballaron arreo para realizar a homenaxe en Gancho, e a Manuel Carrete polas súas ideas e axuda nos traballos.

Finalmente, a rexedora convida a todos os homes e mulleres de Castro Caldelas a asistir a este “significativo acto de reivindicación e recoñecemento”.