A programación do 8M no concello de Ribas de Sil comezou o 6 de marzo cunha xornada na que o alumnado do CEIP de San Clodio compartiu actividade coas persoas residentes na residencia de maiores de Ribas de Sil. Xuntos participaron nun xogo de bingo moi particular no que foron repasando figuras femininas salientables da historia, como María Pita, Concepción Arenal, Emilia Pardo Bazán, Maruxa Mallo, María Casares, María Concepción Pérez Iglesias ou Clara Campoamor. Posteriormente, os nenos e nenas trasladáronse á Casa do Concello, onde plasmaron nun traballo, o aprendido ao longo da xornada na que estiveron acompañados pola concelleira de Igualdade, Rosy Quiñones.
Dentro das actividades tamén se visitou a mulleres que desempeñan o seu traballo en distintos servizos e establecementos do municipio, como o supermercado local, o servizo de Correos e o centro de saúde, recoñecendo así o seu labor diario. Ademais, unha mesa informativa percorreu diferentes puntos repartindo material de sensibilización e divulgación.
Xa o 8 de marzo, o equipo de goberno do concello de Ribas de Sil visitou a Jimena Mondelo Díaz, que naceu en Peites o 3 de febreiro de 1924. Despois de vivir en Barcelona regresou ao seu concello natal, onde reside na actualidade. Jimena asegura que é posible chegar ben aos 102 anos, e dío unha muller que tivo que superar dificultades nos primeiros anos da súa vida.
No ano do seu nacemento, España vivía baixo a ditadura de Primo de Rivera e o mundo atopábase nun período de grandes cambios tras a Primeira Guerra Mundial. Naquela época, as mulleres aínda non tiñan dereito ao voto en España. Non sería ata 1931 cando se recoñeceu o sufraxio feminino, grazas á defensa desta lei no Parlamento por parte de Clara Campoamor, que fixo posible que as mulleres puidesen votar por primeira vez nas eleccións. Ela hoxe pode votar.
Ata alí achegáronse o alcalde, Roberto Castro; a concelleira de Igualdade, Rosy Quiñones, que foi a encargada de entregar o ramo de flores; e as concelleiras María del Carmen González e Fina Alonso, esta última tamén veciña de Peites.
8M 2026 Ribas de Sil
