Castro Caldelas xa ten imaxe oficial para a súa Semana Santa 2026. O recoñecido ilustrador, Siro López, foi o encargado de dar vida a unha obra “que rompe coa estética barroca tradicional para abrazar unha linguaxe visual máis humana, directa e cargada de esperanza”, din dende o concello.
A diferenza das representacións centradas na dor da Paixón, tan propias da Semana Santa, o cartel de Siro pon o foco na Resurrección. “A figura central, un Cristo que emerxe vitorioso do sepulcro, destaca sobre unha vibrante aura amarela que simboliza a divindade. Esta elección non é casual: a obra rende homenaxe á recente restauración do Cristo barroco do Santuario da localidade, devolvéndolle o seu esplendor baixo unha nova mirada artística”, explican tamén dende o concello. Para completar a descrición, sinalan que “aos pés da figura divina, varios fieis de costas contemplan o milagre, convidando a quen observa o cartel a unirse a esa mirada de fe”.
ESTILO ARTÍSTICO
O estilo empregado polo autor evoca a ilustración editorial e o cómic. Siro emprega liñas claras e cores planas “para conectar emocionalmente co espectador”. O cartel non só é unha peza relixiosa, senón tamén un tributo ao patrimonio local. Entre as nubes e a bruma do fondo, perfílase a inconfundible silueta do Castelo de Castro Caldelas e o santuario da Nosa Señora dos Remedios.
SIRO LÓPEZ
Nado en Ferrol en 1943, Siro foi un debuxante precoz con facilidade para o debuxo desde a infancia. Non tardou en experimentar con todas as técnicas posibles: tinta e pincel, sanguina, carbón, grafito, pluma, pastel ou mesmo técnicas dixitais. Ademais, foi o deseñador da Praza do Humor da Coruña (1990) e o autor do curso de galego Imos aló?, emitido na Televisión de Galicia entre 1989 e 1990.
Ademais, a Xunta de Galicia colaborou este 2026, polo Día da Ilustración, coa Asociación Galega de Profesionais da Ilustración nunha homenaxe a este senlleiro ilustrador.
