O Concello da Pobra do Brollón acollerá na Semana Santa a II Copa de España de Rastreo sobre Xabarín e, Trofeo A súa Maxestade o Rei. A organización corre a cargo da Real Sociedade Canina de España (RSCE)e terá lugar do 3 ao 5 de abril sendo unha das competicións de rastreo canino máis importantes desta modalidade en España.
Durante a competición, poñerase en xogo o Certificado de Aptitude de Caza en Tránsito (CACT), dirixido a cans de rastreo do Grupo 6º, na especie de caza xabarín, consolidando así a excelencia e o nivel técnico dos participantes en España. “A Pobra do Brollón, situada no corazón da Ribeira Sacra, ofrece unha contorna natural privilexiada, con vales, montañas e o río Sil, ideal para quen desfruta do sendeirismo e a natureza”, afirman dende a organización.
Referindo outros atractivos para aqueles que se acheguen á competición, amigos e familias, a organización informa tamén que “a zona é tamén recoñecida polos seus viñedos e a súa tradición vinícola, sendo parte dun roteiro que combina paisaxe, cultura e gastronomía. O municipio destaca polo seu patrimonio histórico, con monumentos como a igrexa románica de San Pedro de Cereixa, que permiten aos visitantes viaxar ao pasado e descubrir a riqueza cultural da zona. Ademais, A Pobra do Brollón é coñecido polo seu famoso entroido, que culmina coa tradicional saída do Oso de Salcedo”.
Finalmente a Real Sociedade Canina de España expresa o seu agradecemento á Xunta de Galicia, Consellería de Medio Ambiente e cambio climático, ao Concello da Pobra do Brollón, ao Tecor Societario da Pobra do Brollón, ao Club Español do Grifón Nivernés e especialmente ao seu patrocinador –Food 4 Dogs–, a colaboración e esforzo na organización desta competición.
