As actuacións, que están sendo executadas pola empresa Xermolo S.A,  teñen un prazo de execución previsto de catro meses e inclúen a realización dun estudo xeotécnico do terreo e o posterior reforzo da estrutura mediante micropilotes e ancoraxes, co obxectivo de estabilizar o muro e restablecer as condicións de seguridade da vía.

A intervención foi declarada de emerxencia tras constatarse unha situación de inestabilidade nun treito de aproximadamente 35 metros, derivada da aparición dunha fenda na calzada que afecta a este punto da infraestrutura.

Desde a detección da incidencia, o tramo permanece pechado ao tráfico. Trátase dunha obra complexa por ser unha zona de especiais condicións xeotécnicas e pola súa proximidade ao leito do río Miño, nun contorno de viñedos con actividade agrícola e tráfico local.

O orzamento para estes traballos supera os 330.000 euros e enmárcase nas intervencións urxentes da Deputación de Lugo para garantir a conservación e seguridade da rede viaria provincial.