Ata o 7 de xuño, Silleda é unha vez máis o punto de encontro do turismo e da cultura de Galicia coa celebración de TUREXPO e FESTUR, a Feira de Festas de Interese Turístico de Galicia. O Concello de Chantada está presente en Silleda cun espazo propio para dar a coñecer algúns dos seus principais recursos turísticos e patrimoniais. Entre eles destaca o Folión de Carros, unha das manifestacións culturais máis singulares do municipio, recoñecida como Festa de Interese Turístico de Galicia e Ben de Interese Cultural.
A promoción turística complétase con información sobre o Camiño de Inverno a Santiago, itinerario xacobeo que atravesa o municipio, de feito desde aquí fanse os quilómetros necesarios para conseguir a Compostela; o Entroido Ribeirao, unha das celebracións máis auténticas e características do territorio ou a Feira do Viño de Chantada que cada ano abre as Feiras do Viño na D.O. Ribeira Sacra.
Ademais da riqueza paisaxística, cultural e gastronómica, parte fundamental da información turística do Concello de Chantada é a súa condición de Municipio Starlight en espazos como o Monte do Faro ou a ribeira onde a calidade do ceo nocturno ofrece unhas posibilidades óptimas para a observación astronómica. En Festur, Chantada lembra aos visitantes que o 12 de agosto despois da eclipse solar total, desde o miradoiro natural no Monte do Faro pódense ver as Perseidas.
Caseta turismo Chantada en Festur 2026 / Concello de Chantada
