O Centro Comercial Urbano de Monforte recupera as noites temáticas do comercio local o venres 26 de xuño baixo o nome “Mundial de Compras”, aproveitando o ambiente do Mundial de Fútbol e coincidindo co inicio das rebaixas de verán.
Esta campaña converterá o centro de Monforte nun espazo de compras, lecer e encontro social, cunha apertura especial dos establecementos participantes de 20:00 a 00:00 horas. “Durante esa noite haberá música, batucada, obradoiros infantís, flocos de millo, hot dogs, propostas especiais nos comercios e unha gran choiva de globos con premios na Praza de España”, refiren dende o CCU.
BENVIDA ÁS REBAIXAS E MOITOS PREMIOS
O Mundial de Compras servirá para darlle a benvida ás rebaixas de verán no comercio local de tal xeito que os establecementos participantes abrirán ata medianoite e algúns deles complementarán a campaña con promocións, descontos, obsequios, mesas doces, decoración temática ou outras propostas especiais para a súa clientela.
O momento central da noite chegará ás 21:30 horas na Praza de España, coa celebración dunha espectacular choiva de 1.500 globos con premios. Concretamente “choverán” 1.000 € en premios que estarán repartidos en 11 premios agochados entre os 1.500 globos (un de 250 €, un de 150 €, 3 de 100 € e 6 de 50 €). As persoas gañadoras terán ata a medianoite para gastar o seu premio nos comercios participantes. Iso si, os cartos “chovidos do ceo” terán que gastarse esa mesma noite para marcar un “golazo nas rebaixas de verán”.
PROPOSTAS DE LECER PARA ESA GRAN NOITE
A programación de lecer para esa noite incluirá obradoiros infantís, instalaranse carriños de flocos de millo e hot dogs (presentando tickets de compra de establecementos asociados ao CCU válidos desde o 1 de xuño de 2026 e ata fin de existencias), e haberá batucada para encher de música as rúas.
O CCU ANIMA A SUMARSE AO AMBIENTE FUTBOLEIRO DO MUNDIAL
“A temática futboleira da campaña responde ao contexto do Mundial de Fútbol, que marcará tamén o ambiente destas datas”, afirman dende o CCU que anima a veciños, visitantes, familias e grupos de amigos a sumarse á festa acudindo –se lles presta–, cunha camiseta, bufanda, bandeira, cores da súa selección favorita ou calquera detalle relacionado co fútbol.
Segundo sinala Ángel Folgueira, xerente do CCU de Monforte, “queremos que o venres 26 de xuño Monforte teña unha desas noites nas que apetece saír á rúa. A campaña combina comercio, rebaixas, música, actividades para familias, premios e ambiente futboleiro, pero o máis importante é que a xente responda e que os comercios participantes poidan aproveitar unha noite especial para conectar coa súa clientela”.
