Ese espazo, coñecido en tempos como ‘A Pista’, foi un mítico punto de encontro de toda a contorna para ir de festa e bailar. Con estes antecedentes, a actual xerencia quixo, dende hai uns anos, recuperar ese ambiente festivo e organizar nos veráns un programa de actuacións en directo e sesións de baile para goce da clientela. 

INAUGURACIÓN DA PROGRAMACIÓN VERÁN 2026

Comezado xa oficialmente o verán, o Hotel Las Vegas (San Clodio) deseñou unha programación de actuacións para os meses de xullo e agosto que comezará o vindeiro domingo 5 cunha sesión vermut por todo o alto.

Para abrir a tempada, ás 13.00 h haberá un concerto de “Movilla & Los Irrepetibles” e cociñado de sushi en directo. “Sushi & rancheras, que máis se pode pedir?”, di Elena Losada, a xerente, con entusiasmo. 

O CONCERTO

O directo que ofrecen “Movilla & Los Irrepetibles” é moi divertido e cheo de momentos para gozar grazas á elocuencia do seu vocalista, Javier Movilla, natural de Castro Caldelas e amante da música mexicana.

Un personaxe “irrepetible” que, acompañado duns grandes músicos, ofrecen un espectáculo no que se rende homenaxe aos grandes autores e intérpretes do xénero, dende os clásicos como Jorge Negrete, Vicente Fernández ou Chavela Vargas, ata versións de artistas e grupos nacionais como Joaquín Sabina, Loquillo, Miguel Ríos, Antonio Flores ou Los Secretos.

Un espectáculo ideal para abrir a tempada en Las Vegas e a escusa perfecta para liar aos amigos/as nunha sesión vermut única.