O pasado mes de maio Barbantia, proxecto da quiroguesa Silvia Martínez, organizou un evento para solteiros e solteiras no Xeoparque Montañas do Courel. A iniciativa consistiu en crear un espazo para coñecer xente de forma normal mentres se daba a coñecer este territorios, un dos máis espectaculares de Galicia.
Tras a gran acollida da primeira edición, Silvia anuncia a segunda convocatoria para os días 17, 18 e 19 de xullo. “Isto non é Tinder, nin First Dates, o obxectivo é compartir unha fin de semana de roteiros, gastronomía, natureza, cultura local e experiencias en grupo nunha contorna privilexiada”, aclara a espelida e simpática organizadora. A experiencia está dirixida, en definitiva, a persoas solteiras que queiran saír da rutina, coñecer xente nova e descubrir Galicia dunha forma diferente, “sen idade mínima nin máxima, xa que realizamos unha selección previa para formar un grupo equilibrado”, explica tamén a organizadora.
Durante a primeira edición, os participantes percorreron algúns dos lugares máis emblemáticos do Xeoparque, visitaron museos e centros de interpretación, coñeceron a historia, a xeoloxía e as tradicións do territorio da man de expertos locais. “Non podemos prometer que vaias atopar o amor da túa vida, pero te vas a namorar do Geoparque” era un dos reclamos empregados nesa primeira experiencia.
O obxectivo, alén da posibilidade de atopar o amor das persoas participantes, é poñer en valor o medio rural e xerar actividade económica en pequenos negocios locais, contando coa colaboración de aloxamentos, restaurantes, adegas, guías e empresas do territorio. Para ter máis información do evento pode accederse a través da páxina web de Barbantia.
BARBANTIA
Silvia Martínez, creadora de Barbantia, leva anos organizando eventos e loxística para no Camiño de Santiago para autocaravanistas, unha necesidade que había no mercado e que ela mesma experimentou hai anos. Agora, ao estar solteira confesa estar a experimentar outra necesidade: a de coñecer xente doutro xeito, non a través dunha aplicación nin dunha foto na internet… dende a naturalidade e o encontro espontáneo. “Así que agora tamén organizo eventos para singles”, di cun sorriso na boca Silvia.
En Xornal de Lemos fixémoslle unha entrevista no ano 2024. Aquí podedes acceder a ela.
