O Consello Regulador da D.O. Ribeira Sacra realizará unha visita promocional a Bilbao este 6 de xullo para achegar a singularidade dos seus viños aos membros da Asociación de Sumilleres de Bizkaia. O encontro terá lugar de 18:30 a 20:30 horas no Hotel Ercilla de Bilbao.
A presentación estará conducida por Juan José Figueroa Treus, presidente da Asociación Galega de Sumilleres, quen dirixe todo o ciclo de presentacións organizado polo Consello Regulador. Durante a sesión realizarase un percorrido polas características que definen os viños da D.O. Ribeira Sacra e pola singularidade dun territorio marcado pola viticultura heroica.
Os asistentes poderán coñecer 14 referencias elaboradas por 10 adegas da D.O. Ribeira Sacra, cunha selección composta por 4 viños brancos e 10 tintos, correspondentes ás colleitas 2020, 2021, 2022, 2024 e 2025. A mostra inclúe elaboracións de Godello, Godello Barrica, Mencía, Mencía Garda e Tinto Ribeira Sacra, representativas da diversidade e calidade da denominación.
Esta nova acción promocional chega despois do éxito da primeira presentación celebrada o pasado 18 de xuño no establecemento La Caníbal, en Madrid, tamén conducida por Juan José Figueroa Treus. A convocatoria reuniu a profesionais da hostalaría e da restauración e obtivo unha excelente resposta tanto pola participación como polo interese mostrado polos asistentes.
APOSTA POR PRESENTACIÓNS A PROFESIONAIS ESPECIALIZADOS DO SECTOR
A través deste programa de presentacións, o Consello Regulador continúa reforzando o posicionamento da D.O. Ribeira Sacra en mercados estratéxicos, promovendo o coñecemento dos seus viños entre os profesionais que desempeñan un papel clave na súa prescrición e difusión.
Tras a presentación de Bilbao, os viños da D.O. Ribeira Sacra continuarán a súa promoción en Cantabria, dando continuidade a un calendario de accións que busca seguir ampliando a presenza da denominación no sector da hostalaría e da restauración.
