Bolmente, no Concello de Sober, repite o seu Festival dos Colados, unha iniciativa que busca dinamizar parroquia e contorna de xeito sostible con actividades para todos os públicos e especial protagonismo para o viño e a música.
Entre as actividades que ofrecen como ‘experiencias’ pódense atopar visitas a viñedos, adegas e patrimonio histórico; roteiros para camiñar ou para realizar en bicicleta, e tamén degustacións e catas. A xente interesada pode acceder á web e reservar praza.
ADEGAS PARTICIPANTES
Este ano participarán oito adegas do territorio: Val da lenda, Tear, Gullufre, Adega Verao, Alouviño, Aborixe Viticultura, EDV Viticultores e Galanteiro. Os asistentes poderán descubrir os seus caldos e participar en catas cun prezo de 20 euros que incluirán degustación de entre tres e catro viños ademais de produtos gastronómicos.
PENSANDO NOS MÁIS PEQUENOS DA CASA
Para facer atractiva a visita a este encontro coa natureza, o viño, e a música, a organización deseñou unha programación especial pensada para gozar en familia. Baixo o título de ‘Festikids’ os asistentes terán a oportunidade de participar en actividades de globoflexia, obradoiros, pintacaras, e xogos tradicionais. E tamén, haberá unha actuación de maxia a argo do Mago JCarron.
Unha iniciativa que xa o ano pasado tivo moito éxito e contribúe á asistencia de público familiar.
CONCERTOS
Movilla & Los Irrepetibles, co seu atractivo repertorio de música mexicana e versións pop-rock de grandes clásicos, fará a sesión vermú ás 12:30 h.
E xa pola noite, o cartel está conformado polo saxofonista Marcos Sabor Sax (19:00 h), o grupo local de rock rural e popular Os Parentes (21:00 h); e Malenne (23:30 h), coñecido grupo indie de Monforte.
Ademais, a organización avisa que ao remate dos concertos “a festa continúa coa nosa mellor selección de temas variados”.
TRANSPORTE DENDE MONFORTE E SOBER
Para facilitar la asistencia, e que a xente non teña que desprazarse en vehículos particulares se non o desexa, a organización habilitará un servizo de balde de autobuses de ida e volta dende Monforte de Lemos e Sober, con parada no recinto de Bolmente. Pódese facer reserva previa na web do festival.
Para saber como xurdiu este festival podedes ler un artigo de Xornal de Lemos do 2025.
