A Devesa de Escairón é un elemento patrimonial natural urbano datado nuns 400 anos de antigüidade e que goza da admiración e do aprezo de moitas xeracións que medraron nel. Segundo a asociación veciñal xa o anterior alcalde “cerrou cunha balaustrada igual que a actual a zona verde e deportiva da Lama, pero foi máis comedido coa Devesa, da que só pechou a zona próxima ó Concello”.

Agora aseguran que a veciñanza do Saviñao “contemplou atónita como se procedía ó peche do lado norte da Devesa de Escairón cunha balaustrada de granito pulido que nin sequera é do país, sen previo proxecto de obra nin presuposto para ela”. Dende a Asociación consideran que esta obra é de pésimo gusto e demostra unha nula sensibilidade paisaxística, “máis propia dun xardín urbano que dun bosque autóctono ubicado nunha vila do rural”.

Consideran desde a asociación veciñal que a medida tomada framenta o conxunto orixinario doado por don Xoán de Forcados, que consistía nunha unidade formada pola Devesa e a zona da Lama, hoxe campo deportivo e ubicación do centro de saúde. A barreira actual elima a perspectiva de fondo do conxunto arbóreo que permite escrutar, de árbore en árbore, dende fóra ata o fondo da Devesa e impide a percepción da maxestosidade das árbores de ata catrocentos anos.

Con todo falan de “aberración paisaxística” e solicitan que se retire o peche granítico construído ata agora. “Poderíase xustificar esta obra como garantía de que non se meterán vehículos na Devesa, pero para esto o peche de madeira, lixeiro e discreto, era máis que suficiente”, conclúen.