Os novos axentes pertencen á 41ª promoción da Escola Nacional de Policía de Ávila e están integrados por cinco mulleres e sete homes, cunha media de idade de 26 anos. O grupo desenvolverá esta fase práctica en diferentes unidades da Policía Nacional, coa finalidade de completar a súa preparación antes da incorporación definitiva ao corpo.

A subdelegada destacou o importante labor que desempeña a Policía Nacional para garantir a seguridade e a convivencia, ao tempo que lles trasladou os seus mellores desexos nesta etapa decisiva da súa formación profesional.

Dos doce policías en prácticas, oito prestarán servizo na Comisaría Provincial de Lugo, dous incorporaranse á Comisaría de Monforte de Lemos e os outros dous farano na Comisaría de Viveiro.

Unha vez rematado este período de prácticas, os axentes elixirán destino definitivo en función da puntuación obtida no proceso selectivo, que combina a cualificación da oposición, as notas acadadas durante a formación na Escola Nacional de Policía e a valoración do período práctico, incorporándose posteriormente ás súas prazas en propiedade mediante concurso xeral.