A charla divulgativa do día 7 celebrarase no Auditorio Municipal desde as 20:00h, contando coa participación do astrofísico, Borja Tosar e a optometrista, Teresa Feás que compartirán os seus coñecementos expertos coas persoas asistentes. A actividade aberta ao público en xeral ten acceso libre ata completar aforo.
Estas iniciativas buscan achegar as marabillas do universo ao público xeral aproveitando a certificación de Chantada como Municipio Starlight. A esta característica que pon en valor o ceo nocturno do municipio, engádese que desde o Concello de Chantada poderá verse a franxa de totalidade da eclipse durante moito tempo.
No Concello de Chantada o proceso da eclipse comezará as 19:32h, alcanzando o seu punto de totalidade ás 20:29h e finalizando ás 21:22h. Durante a totalidade, o sol atoparase a unha altitude de 11° e unha posición de 280° Oeste. Para desfrutar da eclipse identificáronse varias localizacións recomendadas:
- No centro urbano suxírense o Parque Eloísa Rivadulla, o Mercado Gandeiro, a zona do Muíño da Alameda e o Parque das Piscinas.
- No resto do municipio o Monte Faro é un punto salientable e todas as zonas con vistas despexadas cara o Faro. Propóñense tamén localizacións en Pedrafita, Veiga e Mariz.
O Concello de Chantada vén de editar un cartel informativo para achegar este tipo de información a veciños e visitantes. Ademais de suxerir localizacións, tamén ofrece recomendacións de seguridade no momento da eclipse: nunca se debe mirar o sol directamente sen protección, sendo imprescindible o uso de lentes homologadas que cumpran a norma ISO 12312-2, non mirar a través de cámaras e outros dispositivos sen os filtros adecuados. As lentes de protección deben de usarse correctamente durante toda a observación. A este respectoas gafas de protección que ofrece a Deputación Provincial, o Concello de Chantada repartiunas entre os participantes nos campamentos infantís e desde servizos sociais ofrécense aos colectivos máis vulnerables.
