A provincia de Lugo promocionarase en todo o territorio estatal por décimo cuarta vez consecutiva aproveitando o seguimento de La Vuelta Ciclista a España cun stand co lema “…E para comer, Lugo” que impulsa a Asociación Provincial de Empresarios de Hostalería e Turismo de Lugo (Apehl).
Na presentación desta iniciativa xa consolidada, o pasado 29 de xullo na Oficina de Turismo da Xunta de Galicia en Lugo, estiveron presentes, entre outras personalidades, o director da Axencia de Turismo de Galicia, Xosé Manuel Merelles; o delegado territorial da Xunta de Galicia en Lugo, Alfonso Villares; o director da Axencia Galega da Calidade Alimentaria (Agacal), Martín Alemparte; o concelleiro de Turismo e Museos do Concello de Lugo, Agustín Gallego, e o presidente da Apehl, Cheché Real.
VISIBILIDADE PARA PROMOVER A GASTRONOMÍA DA PROVINCIA
A zona VIP da saída de cada unha das etapas do evento deportivo contará cun estand de …E para comer, Lugo. “Esta ubicación estratéxica propicia unha exposición privilexiada da riqueza gastronómica e turística da provincia lucense”, afirman dende a APEHL. Persoal pertencente á Asociación será o encargado de ofrecer ás persoas asistentes —ciclistas, patrocinadores e prensa, entre outros— petiscos elaborados con produtos autóctonos, materiais promocionais da provincia e exemplares da nova edición da guía turístico-gastronómica …E para comer, Lugo.
O presidente da APEHL, Cheché Real, subliñou a relevancia do sostemento da acción ano a ano: “A provincia de Lugo está orgullosa de continuar a ser divulgada e celebrada entre o público nacional a través dun evento deportivo que nos une a todos”. Seguidamente, agradeceu aos organizadores de La Vuelta, á Xunta de Galicia e ás diferentes entidades involucradas a súa colaboración.
PROVEDORES E ENTIDADES COLABORADORAS
Salientar neste apartado os consellos reguladores da Agricultura Ecolóxica (CRAEGA), Ribeira Sacra, Ternera Gallega, Queixo Arzúa-Ulloa, Queixo de O Cebreiro, Queixo de Tetilla, Queixo San Simón da Costa, Pataca de Galicia, Castaña de Galicia, Pementos de Mougán, Mel de Galicia, Fabas de Lourenzá, Grelos de Galicia e Aceite de Quiroga, así como as asociacións Asoporcel, Avimós, Asovega e Afapan. Tamén colaboran Artesanía Alimentaria (Agacal), Armadores de Burela, Galletas Daveiga, Cafés Candelas, El Progreso, INPE, Transportes Valín e Hijos, Grupo Cinematográfico Fonmiñá e Jazz Lugo.
