O VIII Túnel do Viño de Amandi abrirá as súas portas o martes, 11 de agosto, ás 19:00 horas. No evento, organizado por Vinosacra, participan 25 adegas e 50 referencias de viños da subzona de Amandi e Sober que se poden degustar nunha carpa instalada na Praza do Concello. Colabora ademais a empresa cárnica lucense, Torre de Núñez.
O Túnel estará aberto ata as 23:00 horas. O mércores abrirá en horario de 11:00 a 15:00 horas. O programa de actividades do día 11 segue coa experiencia gastronómica gratuíta que ofrece a Axencia Galega da Calidade Alimentaria (AGACAL). Esta cita con produtos galegos 100% terá lugar na Praza do Concello desde as 21:00h e estará guiada polo cociñeiro soberino, Martín Mantilla. Ao mesmo tempo actuará o grupo DosEnPunto.
Feira da Rosca
O mérciores, 12 de agosto, ás 10:00 horas terá lugar a apertura dos postos, entre os que haberá tres stands para mercar roscas, outros postos con produtos da zona, artesanía ou olería tradicional.
Ás 10:30 horas haberá unha demostración de xoiería e forxa dentro do programa Mans artesáns da Vicepresidencia da Deputación de Lugo. Entre as 11:00 e as 13:00 horas haberá un obradoiro de fieltro a cargo de Ovella Viva. Ás 12:00 horas dará comezo a actuación do grupo tradicional Os Ministreles. A degustación gratuíta das 2000 racións de rosca con queixo será a partir das 13:00h.
