O incendio forestal declarado este mércores en Taboada, na parroquia de Insua, afecta xa unhas 20 hectáreas, segundo os últimos datos facilitados pola Consellería do Medio Rural. O lume comezou ás 18.38 horas e mantense próximo á estrada LU-611, que comunica Taboada con Rubián, no municipio de Bóveda.
O CONCELLO ALERTA DE QUE SE EXPANDE “RAPIDAMENTE”
A través das súas redes sociais, o Concello de Taboada advertiu de que o incendio se atopa “moi preto” da LU-611 e de que se está expandindo “rapidamente”. “Pedimos que se extremen as precaucións e que se evite transitar pola zona ata que sexa segura”, trasladou o goberno local á veciñanza.
MÁIS MEDIOS MOBILIZADOS
Para a extinción do lume mobilizáronse ata o momento dous técnicos, nove axentes, 13 brigadas, 11 motobombas, catro pas, dúas unidades técnicas de apoio, cinco helicópteros e catro avións. Ao operativo sumouse tamén a BRIF de Laza, dependente do Ministerio para a Transición Ecolóxica e o Reto Demográfico, que desprazou ademais dous helicópteros.
A MESMA PARROQUIA XA ARDERA A FINAIS DE XULLO
A parroquia de Insua xa fora escenario doutro incendio durante a última semana de xullo. Aquel lume arrasou 46,43 hectáreas, das cales 41,1 correspondían a monte arborado e 5,53 a monte raso. O novo incendio volve así afectar unha zona castigada polo lume hai apenas unhas semanas, mentres os equipos de extinción continúan traballando para frear o avance das lapas.
