No inicio do seu pregón, José Tomé agradeceu a invitación para participar nas festas e, especialmente, o traballo das persoas que fan posible que se celebren cada ano, “detrás de cada celebración hai moito traballo, moita ilusión e moitas horas entregadas para facer posible que todo saia adiante”.
Tomé destacou tamén que as festas son unha forma de manter vivas as tradicións e transmitir aos máis novos as experiencias e lembranzas das xeracións anteriores, “Todos temos algunha lembranza das festas, experiencias que acaban formando parte da memoria de cada persoa e da identidade colectiva das parroquias”.
“Monforte non é só o seu núcleo urbano. Monforte tamén son as súas parroquias. Temos que estar aquí, escoitarvos, atender as vosas necesidades e intentar mellorar a vida de todos os veciños e veciñas”, subliñou e fixo especial referencia á identidade propia de Gullade, ás súas tradicións e ao seu patrimonio, citando como exemplo a igrexa parroquial de Santo Acisclo, situada en A Eirexe, un templo de orixe no século XVII que, ao longo das xeracións, converteuse nun elemento fundamental da vida espiritual e social da parroquia.
O rexedor reivindicou o valor paisaxístico e natural de Gullade como parte da Ribeira Sacra e puxo en valor a paisaxe de interior que caracteriza esta zona, “con pequenas aldeas e espazos naturais nos que a natureza continúa marcando o ritmo das estacións.
José Tomé agradeceu a participación de Pablo Losada e Daniel Dafonte, xogadores do Club Lemos, e asegurou que o deporte constitúe, ao igual que as festas, un importante elemento de unión entre as persoas. Puxo en valor a tempada realizada polo Club Lemos, que estivo a piques de conseguir o ascenso a Terceira División, e animou ao equipo a afrontar a próxima tempada co obxectivo de conseguir o ascenso. “O Lemos ten que estar en Terceira, por historia e por cidade”, afirmou.
José Tomé concluíu desexando a todos e todas “unhas magníficas festas de San Roque” e animando á veciñanza a gozar da música, da alegría e dos encontros propios destas celebracións.
