Cunha matrícula de 110 nenos e nenas durante os meses de xullo e agosto, foron moitas as actividades nas que participaron, con actividades nas aulas realizando obradoiros de todo tipo ata excursións fora do municipio, para visitar a Granxa Puluán, en Reigada (Monforte de Lemos), onde a rapazada se converteu en expertos gandeiros por un día.
Ata estes campamentos tamén se achegou Paco Nogueiras, co seu espectáculo infantil “Son Animal”, a Fundación Legar que lle achegaba os sons da natureza. Tampouco faltou a visita dos membros da Benemérita cos seus vehículos oficiais. Aínda que unha das actividades máis máis especiais dos campamentos deste ano foi a realización dun mural que leva por título “A semente somos nós” en homenaxe aos que loitaron contra os incendios forestais do pasado verán.
O ventes, tralo almorzo, grandes e pequenos saltaron e bailaron coa música da compañía ANIMAR.T. Ata alí achegáronse os responsables municipais, o alcalde de Quiroga, José Luis Rivera, a concelleira da área de Educación e Infancia, Maite Pérez Grao, e os concelleiros, Vicente Parra, Luis Manuel Arias e Antonio Marcos. Esta programación infantil está organizada dende a área de Igualdade do Concello dentro do programa “Concilia Quiroga”, cofinanciado a través do Plan Corresponsables da Xunta de Galicia e do Concello de Quiroga.
Campamentos de Verán Quiroga / Concello de Quiroga
