A estrada comunica numerosos núcleos como Lebrón, Teixeira, Forgas, Covadelas e A Veneira de Roques. Ademais de acceso a casas particulares, a vía é o único acceso a lugares de interese turístico e patrimonial como as minas de ferro da Veneira e o lugar de San Vitorio, onde se celebra anualmente unha popular romaría e destino para sendeirismo, ciclismo e carreiras por montaña.
Tras o incendio forestal que sufriu a zona en 2022, e a posterior saca de madeira, o firme da estrada quedou gravemente deterioriado. Son dez quilómetros sen apenas asfalto, con partes case intransitables, buratos e moita pedra solta que representan un perigo para vehículos e condutores.
A veciñanza leva tempo protestando polo deterioro da estrada, queixas que lle fixeron chegar este luns aos representantes do goberno municipal da Pobra do Brollón. O alcalde, Xosé Lois Maceda, asegura que leva moitos meses presionando para a rehabilitación da estrada e que solicitará esta semana unha reunión coa presidencia da Deputación de Lugo para trasladar a preocupación e seguir a esixir solucións.
