O conselleiro de Sanidade, Antonio Gómez Caamaño, garante que se están aplicando “todos os procedementos e protocolos de saúde pública” en relación co gromo de sarna que afecta unha vintena de maiores nunha residencia que xestiona DomusVi en Monforte de Lemos.

A preguntas da prensa tras o Consello deste luns sobre se a Xunta prevé intervir esta residencia, o conselleiro dixo que só se podía pronunciar respecto da situación de “saúde pública”. Así, sinala que a Xunta mantén unha comunicación “responsable” con este centro.

Deste xeito, relata que hai 20 casos rexistrados. Ademais, sinala que o peche do gromo non se pode decretar ata que pasen oito semanas desde a detección do último caso. Esta residencia afectada por un gromo de sarna tamén sufriu a pasada semana un incendio no que resultaron feridos usuarios.