EFE.- Un home duns trinta anos de idade foi detido onte en Monforte de Lemos como investigado polos delitos de roubo con violencia e intimidación e detención ilegal.

Presuntamente, o individuo investigado sacoulle os cartos que previamente lle pagara a unha prostituta por un servizo e a continuación deixouna pechada no negocio da súa familia.

Segundo informaron á axencia EFE fontes policiais, este suceso tivo lugar na madrugada do luns para o martes, cando o detido supostamente requiriu os servizos dunha prostituta, á que lle pagou por adiantado. De acordo coa información que manexan os investigadores, despois de manter relacións o home non “quedou satisfeito”, polo que lle reclamou á muller o diñeiro que previamente lle tiña pagado e ameazouna para que llo devolvese.

Despois das ameazas deixou á muller, “por un tempo breve”, retida no negocio da súa familia, pero a moza púxose a berrar e un veciño que a escoitou chamou á Policía Nacional. Os axentes chegaron ao lugar dos feitos e practicaron a detención do sospeitoso, estando previsto que o detido pase hoxe a disposición xudicial.