Na investigación levada a cabo constatouse que semanas antes do incendio, a Garda Civil realizara inspeccións nas instalacións desta empresa incendiada ante sospeita de que alí se almacenasen produtos inflamables para levar a cabo a actividade laboral. Con todo, as primeiras investigacións realizadas despois do incendio xa puxeron de manifesto que se trataba posiblemente dun incendio provocado, tendo en conta que non había accesos forzados e que os presuntos autores do mesmo, días antes de producirse o sinistro, desconectaran as cámaras de seguridade para impedir ou dificultar a obtención de probas.

Debe destacarse o perigo que podía implicar o incendio xa que no interior da nave almacenábase gran cantidade de depósitos e bidóns abertos contendo líquidos inflamables empregados habitualmente para a actividade empresarial desta empresa. A maior parte dos seus produtos atopábanse esparexidos polo chan formando cordóns para así facilitar a propagación do lume. Mesmo se observou unha carretilla elevadora portando un depósito de 1000 litros de disolvente, encaixada contra unha das principais máquinas afectadas.

No lugar tamén se puideron ver outros líquidos non inflamables derramados coa intención de que propagasen as chamas aínda que o autor dos feitos non chegou a conseguilo, evitándose así, que os efectos fosen maiores, aínda que si se viron afectadas varias máquinas propiedade da empresa e tamén parte das instalacións desta empresa, que seguiu desenvolvendo alí a súa actividade laboral.

Para o esclarecemento dos feitos, durante os últimos meses tomáronse declaracións a grande parte dos empregados e solicitáronse outras probas que permitirían determinar a presunta participación nos feitos de A.D.V. de 80 anos, quen foi detido na tarde de onte para a súa posta a disposición xudicial. Trátase dun coñecido empresario da localidade de Sarria, nalgunha de cuxas empresas xa se produciron incendios similares.

A investigación continúa aberta e non se descartan novas detencións. Este xoves membros da Garda Civil pocederon a rexistrar as oficinas propiedade do detido en busca de máis indicios. O detido será posto a disposición xudicial perante o xulgado de Instrución nº 1 de Sarriadurante.