Un tren que cobre a ruta entre a estación viguesa de Guixar e Barcelona tivo que deter a súa marcha en Quiroga despois de golpear unhas ramas e sufrir unha avaría, o que levou que a circulación permanecese suspendida na zona durante dúas horas e media.
Segundo trasladou o Administrador de Infraestruturas Ferroviarias (Adif) ao 112 Galicia, no convoi viaxaban máis de 200 pasaxeiros e todos resultaron ilesos. En concreto, os feitos tiveron lugar ao redor das 10,45 horas deste luns na vía férrea lindeira á N-120, á altura do seu punto quilométrico 481, onde o Alvia enganchou unhas ramas e rompeu o pantógrafo, o que levou que tivese que deterse a marcha.
Posteriormente, persoal de Adif informou da situación aos xestores do 112 Galicia, que a puxeron en coñecemento da Garda Civil, os Bombeiros de Monforte, a Policía Local, o Grupo de Emerxencias Supramunicipal (GES) de Quiroga e Protección Civil. Como consecuencia, a circulación suspendeuse, o que afectou a ese tren e a un convoi de mercadorías. Finalmente, foi restablecida ás 13,15 horas.
