O cadáver atopado podería ser o de Carlos Yáñez, Misi, veciño desaparecido da residencia de Prodeme o pasado 4 de agosto. O lugar no que apareceu o cadáver este mércores 5 de setembro atópase nas proximidades de Prodeme e foi, polo tanto, a zona na que se buscou ao desaparecido na última batida feita o 30 de agosto.

Ao redor das 13.00 horas de hoxe procedeuse ao levantamento do cadáver. O corpo atopado estaba desfigurado de levar días morto e a simple vista non se pode concluír que se trate do veciño desaparecido. Si hai coincidencias nalgunhas prendas de roupa que levaba Misi no momento da desaparición, pero haberá que facer a autopsia e outras probas que conclúan que efectivamente se trata do cadáver de Carlos Yáñez.

O vehículo que recolleu o cadáver para o seu traslado tivo unha avaría polas irregularidades do terreo, todo apunta a que rompeu o cárter e quedou inmobilizado. Houbo que chamar a outro vehículo para que levase o cadáver e a unha grúa para levar o vehículo avariado.