Corte da estrada LU-651 entre Folgoso do Courel e Santa Eufemia

O Concello de Folgoso do Courel toma as primeiras medidas ante o espectacular afundimento de terras acontecido esta mañá.

Segundo informa a través das súas redes sociais o Concello de Folgoso do Courel, no afundimento de terra desta mañá no punto quilométrico 18.300 da estrada LU-651 non houbo que laiarse de danos persoais.

Ante esta situación recomendan aos condutores que eviten usar esa vía e que collan a secundaria que pasa por Vidallón, tendo en calquera caso debidamente sinalado o corte ao tráfico con persoal do GES e efectivos de Tráfico.

Dende o Concello de Folgoso do Courel comunican tamén que están en contacto coa Xunta –titular da estrada– desde que se coñeceu o suceso e para colaborar conxuntamente na busca de solucións.

Foto que puido captar un veciño dende Vilamor no momento do sinistro. Foto cedida.

O espectacular corremento de terras que tronzou a estrada aconteceu esta mañá de domingo 20 de marzo e, segundo se especula, feito que non puidemos contrastar, o desplome puido deberse ao afundimento dunha galería da canteira de pizarra próxima ao lugar do sinistro.

DEIXAR UN COMENTARIO

Please enter your comment!
Please enter your name here