Pasadas as 21,00 horas, saíu da vía, segundo informa o 112, o primeiro eixo da primeira composición do tren. O servizo de emerxencias recibiu o aviso do descarrilamento a través de Adif. Segundo indicaba o seu persoal, os feitos sucederan entre San Clodio de Quiroga e Freixeiro, á altura do punto quilométrico 500 da N-120.
Con estes datos, o 112 requiriu a intervención do GES de Quiroga-Folgoso do Courel, das Agrupacións de Voluntarios de Protección Civil de Quiroga e de Ribas de Sil e dos axentes da Garda Civil, que colaboraron co persoal de seguridade de Adif no transbordo dos pasaxeiros a outro tren, procedente de Ponferrada, que levou á pasaxe ata a estación de San Clodio, onde esperaban varios autobuses para levar aos pasaxeiros aos seus destinos.
