As choivas marcaron o comezo do novo ano. Entre as 00 e as 18 horas do día 1 de xaneiro, o 112 contabilizou un total de 384 incidencias en Galicia. As emerxencias máis frecuentes foron as inundacións en vivendas (115), seguidas de incidencias relacionadas coas estradas: obstáculos como pedras ou terra (74), bolsas de auga (43) e inundacións (55). Tamén se produciron inundacións en garaxes (42) e rúas (26).
As provincias máis castigadas pola choiva foron Pontevedra (195), Ourense (108) e Lugo (69). No Saviñao un particular informaba este domingo ao 112, dunha ponte da estrada municipal que caera ao río sen provocar danos persoais, pero con perigo para a circulación de vehículos. Outros concellos do sur da provincia nos que se alertou de incidencias foron Sarria, con 9 incidencias inscritas, Chantada onde o río Asma se desbordou afectando a vehículos estacionados nas inmediacións, e Carballedo, con 8 incidencias en cada concello.
Na N-540 á altura da capitalidade municipal de Taboada producíronse desprendementos polas choivas, que non obrigaron a cortar o tráfico, o mesmo que no ramal de acceso a Monforte desde Chantada. Na N-120, preto da saída cara á Pobra do Brollón a choiva formou unha fochanca cortante que propiciou que ata unha ducia de turismos tiveran que parar a circulación.
Nas estradas provinciais, o servizo de Vías e Obras está realizando unha avaliación técnica das derrubas provocadas pola gran cantidade de auga caída en puntos como a LU-P-1801, que á altura do punto quilométrico 7, en Chantada; e do punto quilométrico 20, en Carballedo, sufriu desprendementos de terras que provocaron a derruba das marxes da vía, que quedou cortada na tarde deste domingo. A circulación quedou este luns restablecida naquelas vías asolagadas pola auga: a LU-P-5701 á altura de Sarria e que conecta A Pobra do Brollón e Folgoso do Courel.
