Os bombeiros tiveron que excarcerar a unha muller despois de que o coche no que viaxaba envorcase de madrugada no municipio de Chantada, á altura do quilómetro 35 da CG-2.1.

O 112 Galicia puxo a situación en coñecemento dos bombeiros do Deza e de Chantada, do GES de Lalín, da Policía Local e da Garda Civil de Tráfico.

Foron os bombeiros de Chantada os que acudiron ao lugar para liberar a muller, que quedou atrapada no interior do vehículo accidentado. Posteriormente, foi trasladada polos servizos sanitarios a un centro hospitalario.