A xuíza que investiga a suposta agresión sexual en grupo nun local de Sarria decretou unha orde de afastamento de 500 metros e a prohibición de comunicarse coa vítima para o cuarto investigado por estes feitos.

Este cuarto investigado polos feitos rexistrados a finais de setembro nun establecemento de lecer nocturno declarou este luns como investigado ante o xulgado de instrución de Sarria, segundo informaron fontes do Tribunal Superior de Xustiza de Galicia.

Ao termo do interrogatorio, a xuíza acordou a prohibición de comunicación e unha orde de afastamento de medio quilómetro coa vítima.

Por estes feitos permanecen investigadas outras tres persoas, dúas das cales están en prisión provisional comunicada sen fianza. A un considéraselle autor dun delito de agresión sexual, cooperador necesario para a comisión doutros e relevación de segredos.

No caso do terceiro, o xulgado decretou liberdade con prohibición de comunicarse ou achegarse á denunciante, retirada do pasaporte e prohibición de saír do territorio nacional. Tamén se fixaron comparecencias quincenais e, no seu caso, está investigado como cooperador necesario.

A causa por estes feitos, precisaron desde o alto tribunal galego, séguese por delitos de agresión sexual, ameazas e revelación de segredos.