A estrada provincial LU-P-5303, de San Clodio ao límite provincial por Torbeo, no municipio lucense de Ribas de Sil, foi cortada na tarde deste mércores polo afundimento do seu firme provocado polas intensas choivas rexistradas nos últimos días.

Segundo informou a Deputación de Lugo, este incidente produciuse no quilómetro 5 da devandita estrada por mor das precipitacións que vive a Comunidade desde hai semanas. Por iso, o ente provincial habilitou desvíos alternativos, “que quedaron debidamente sinalizados”, e xa traballa para poder restablecer o tráfico canto antes.