Ás 3.45 deste sábado 29 declarábase un incendio nunha casa no lugar de Barantes de Arriba, no concello de Sober. A vivenda ardeu por completo, pero o seu propietario non sufriu danos de consideración, aínda así foi trasladado, por precaución, ao Hospital Comarcal de Monforte.

En canto o 112 tivo comunicación do sinistro, a través da chamada dun particular, requiriu a intervención dos Bombeiros de Monforte, da Garda Civil, de Protección Civil e do 061-Urxencias Sanitarias. Desde ese momento, os servizos de emerxencias traballaron para sufocar o incendio, que se reavivou durante as primeiras horas desta mañá.