Un home resultou ferido este luns tras quedar atrapado baixo unha rozadora en Samos. En concreto, o suceso tivo lugar en Montán ao redor das 18.30 horas.

Segundo informa o 112 Galicia, foron os veciños do ferido quen solicitaron axuda urxente para un home que se atopaba tendido nunha leira.

Tal e como informaron, quedara atrapado baixo unha máquina que estaba enganchada a un tractor. Tratábase dunha rozadora, da que foi liberado polas persoas que acudiron na súa axuda.

Así mesmo, avisouse ao Corpo de Bombeiros de Sarria e aos profesionais de Emerxencias Sanitarias Galicia-061, quen enviaron varios equipos, incluído o que viaxaba a bordo do helicóptero con base en Ourense.

Con todo, o traslado ao hospital puido realizarse en ambulancia. Nesta operación tamén colaboraron axentes da Garda Civil.