Ás 14.16 horas do xoves 18 de setembro iniciouse o incendio forestal rexistrado no concello de Pantón, parroquia de Pombeiro, no que se mantén activa a Situación 2 de forma preventiva pola súa proximidade a varios núcleos do municipio.

A conselleira do Medio Rural, María José Gómez, detallaba este venres tras a súa visita ao Posto de Mando Avanzado do Concello de Pantón que o incendio forestal “recobrou forza” e “de forma explosiva” comezou a estenderse saltando o río Cabe para entrar no Concello de Sober.

Segundo as últimas estimacións afecta unha superficie de arredor de 1.400 hectáreas, parte delas no Concello de Sober. Para a súa extinción mobilizáronse, de xeito acumulado, 12 técnicos, 62 axentes, 82 brigadas, 62 motobombas, 9 pas, 4 unidades técnicas de apoio, 13 helicópteros e 12 avións. Tamén se conta con efectivos da Unidade Militar de Emerxencias (UME).