Un home foi trasladado ao hospital con queimaduras na cara por mor dun incendio nunha vivenda unifamiliar en Láncara. Aínda se descoñecen as causas do incendio, aínda que os efectivos de extinción apuntan a que puido orixinarse por un curtocircuito, segundo recolle o 112 Galicia. Este incendio é un dos 16 lumes urbanos que rexistrou o Centro de Atención Integrada ás Emerxencias de Galicia (CIAE) entre o sábado e o domingo.
Tal e como apunta, “ningún resistiu gravidade”, xa que non houbo máis feridos e os danos materiais foron de “escasa importancia”; a excepción do sucedido en Neda esta mañá, que calcinou o recibidor e o falso teito. No caso do incendio en Láncara, o 112 Galicia recibiu o aviso por parte do persoal do Distrito Forestal da zona e doutros alertadores. Estes solicitaron asistencia médica para un home que tiña queimaduras na cara na parroquia de Río, que foi trasladado por persoal de Urxencias Sanitarias de Galicia-061. Pola súa banda, os Bombeiros de Sarria encargáronse de extinguir o incendio, ao que tamén se mobilizou a Garda Civil. Afectou fundamentalmente á parte superior da vivenda, aínda que todo o inmoble sufriu as consecuencias do lume e do fume.
16 INCENDIOS ESTA FIN DE SEMANA
O 112 Galicia contabilizou un total de 16 incendios urbanos entre o sábado e o domingo, entre os que o único ferido foi o veciño de Láncara. En canto aos danos materiais, a central de emerxencias unicamente resalta o ocorrido en Neda, onde ardeu a entrada, na que gardaban algúns electrodomésticos e outras pertenzas. Dos 16 incendios contabilizados, seis producíronse este domingo e outros 10 o sábado, aínda que puideron ser ata 12 “de confirmarse dúas falsas alarmas”, indica o CIAE. Sobre a orixe destes lumes, destacan o factor eléctrico, as fontes de calor e as chemineas. Por concellos, estas situacións producíronse este domingo en Láncara, Neda, Lalín e A Coruña –onde houbo tres–, mentres que o sábado rexistráronse en Vilagarcía, Culleredo, Noia, Cambados, Irixoa, Santiago, A Guarda, Trabada, Maside e Oleiros.
“SUSTO” POR ACUMULACIÓN DE MONÓXIDO DE CARBONO
Por outra banda, tres persoas estiveron a piques de sufrir unha intoxicación por monóxido de carbono en Calvos de Randín ao tentar cociñar sobre unha grella dentro dunha habitación. Segundo relata o 112 Galicia, ao acender o lume con carbón, consumiuse todo o osíxeno da estancia, dando lugar a unha acumulación por monóxido que estivo a piques de afectar o estado de saúde do tres ocupantes. A central de emerxencias asegura que, finalmente, o suceso quedou nun “susto”, aínda que as medicións realizadas polos membros do GES de Muíños deron positivas.
