O Concello de Bóveda, pensando nos maiores, organiza unha vez máis un obradoiro de memoria baixo o título ‘ActivaMente’. A actividade, de grande interese para a veciñanza, será de balde e realizarase os martes de 11:00 a 12:30 h. sendo a primeira sesión o vindeiro martes 5 de abril ás 11:00 horas no Centro Sociocultural. Está dirixida a maiores de 55 anos ou persoas con necesidades de estimulación cognitiva e durará todo o segundo trimestre.
As persoas interesadas poden inscribirse na Casa do Concello ou chamar ao teléfono 982 42 61 77.
EXPOSICIÓN DE PINTURA E TEATRO
O concello retoma este mes de abril a dinamización do espazo expositivo do Centro Sociocultural que se vira afectado pola pandemia. Farao coa inauguración dunha exposición pictórica que amosará a obra do veciño da localidade Henrik Lindegarrd Jensen, coñecido como ‘El danés’. Será o vindeiro día 9 de abril ás 19:00 horas e haberá un aperitivo para as e os presentes.
Poderá ser visitada de luns a venres e en horario de 10:00 a 14:00 h. pola mañá, e de 16:30 a 19:00 h. só os martes e os mércores. A mostra estará no Centro Sociocultural ata o 9 de maio.
Por mor da restrición de aforos, as exposición que se viñan realizando neste espazo, e organizadas polo Concello de Bóveda, deixaron de realizarse. Agora, ante a nova situación pandémica, o concello retoma este tipo de eventos e ofrece a sala de mostras a calquera artista que o necesite.
O mesmo sábado, 9 de abril, volve o ciclo ‘Expresións teatrais’ de teatro afeccionado coa posta en escena da obra ‘A tortilla e a peste’ a cargo de Nova Escena Teatro no Centro Sociocultural ás 20:00 horas. Trátase dunha comedia e está recomendada para todos os públicos.
Sinopse
Varias mulleres contan a súa experiencia durante o período de confinamento. A privación de contacto, o illamento, a distancia, fan que cousas cotiás como unha simple tortilla adquiran unha dimensión diferente.
