Segundo informaba o CIAE 112 Galicia, o accidente de tráfico tivo lugar o xoves 6 de xuño ás 18:00 h. cando un vehículo que entraba en Monforte perdeu o control do mesmo na rúa Doutor Casares, a poucos metros do cruce coa Rúa San Pedro e coa Ronda M. Emilia Casas Baamonde.
Todo indica que por mor dun desmaio do condutor, este perdeu o control provocando que o seu coche invadise o carril contrario enfuciñando contra outro que pasaba nese momento, saíndo a continuación rebotado contra unha furgoneta que había aparcada. O golpe foi tan forte que o furgón estacionado remontou a beirarrúa e causou danos a unha muller que pasaba nese momento.
Tanto condutor causante como a súa acompañante e o condutor do outro vehículo resultaron feridos; o máis grave, o primeiro que ademais tivo que ser rescatado do interior do vehículo polos bombeiros. Liberado este, foi trasladado cos outros feridos ao Hospital Comarcal de Monforte para recibir atención médica.
Segundo informaba onte pola noite un medio de comunicación local de prensa escrita, a acompañante do vehículo causante accionou o freo de man de forma reactiva ao ver como o condutor perdía o sentido e o control do auto. Esta espontánea acción puido minimizar as xa importantes consecuencias do sinistro.
