A Garda Civil investiga o condutor dun turismo que foi interceptado nun control de velocidade na estrada CG-2.2 de Monforte de Lemos, cando circulaba a 136 quilómetros por hora nun tramo cuxa velocidade máxima permitida é de 90, e co carné retirado.

Segundo informaron fontes do Instituto Armado, os axentes que identificaron o condutor comprobaron que lle consta unha perda de vixencia do carné, ata agosto, por esgotar todos os puntos, e que tamén ten retirado o permiso de conducir por orde xudicial ata outubro.

Esta suspensión xudicial impúxoselle por ser responsable, en outubro pasado, dun accidente de tráfico no que deu positivo por alcoholemia. Así mesmo, a perda de puntos do carné produciuse por conducir baixo os efectos do alcol e por circular con exceso de velocidade.

Neste caso, foi interceptado novamente por un exceso de velocidade e a Garda Civil instruíu dilixencias por un suposto delito contra a seguridade viaria. O condutor foi citado para comparecer nunha vista rápida nos xulgados de Monforte.