Axentes da xefatura provincial da Policía Autonómica en Lugo, en colaboración coa Policía Nacional, levaron a cabo un dispositivo conxunto de prevención de consumo de alcol por menores de idade o pasado 12 de agosto, no marco das festas de Monforte de Lemos. Como resultado das inspeccións identificáronse 56 persoas e levantáronse oito actas de infracción. Ademais, interviñéronse diversas sustancias estupefacientes.

En concreto, seis do oito actas foron por consumo de alcol por parte de menores e unha a un establecemento pola venda de alcol a menores con infraccións. Ademais, rexistrouse outra acta de infracción por tenencia de sustancias estupefacientes na vía pública.

O dispositivo enmárcase nas actuacións para velar polo cumprimento da Lei 11/2010, de 17 de decembro, de prevención do consumo de bebidas alcohólicas en menores de idade, co obxectivo de previr a venda e a subministración a menores de idade, tanto en locais de lecer como bares, pubs ou discotecas como en supermercados e tendas 24 horas que sexan establecementos expendedores de alcol e tabaco. Tamén se efectúan intervencións preventivas nas concentracións da mocidade nas vías públicas, para controlar e evitar o consumo ilícito.

A actividade dos axentes céntrase sobre todo en tarefas de inspección a locais e control e vixilancia das zonas de lecer frecuentadas por menores de idade.