Comeza a conta atrás para o comezo do Entroido, e con el chegan os tres certames tradicionais que promove o Concello de Monforte: Xoves de Compadres, Xoves de Comadres e Desfile de comparsas e disfraces.
Este luns, 19 de xaneiro, o Equipo de Goberno aprobou as bases de participación e os formularios de inscrición, ambos documentos publicados na páxina web do Concello. O prazo para inscribirse comeza o 20 deste mes e a partida destinada a premios ascende a un total de 25.000 €.
O Xoves de Compadres celebrarase o día 5 de febreiro, o Xoves de Comadres será o 12 de febreiro, o Desfile terá lugar o martes 17 de febreiro (Martes de Entroido) e o mércores 18 pecharase o calendario festivo co tradicional Enterro da Sardiña.
25.000 € en premios para O entroido 2026
O rexedor monfortino, José Tomé, anima como cada ano a todos os monfortinos e monfortinas para “participar nos diferentes concursos do Entroido que convocamos, e tamén aos veciños e veciñas doutros Concellos, dado que o Martes de Entroido destinamos unha partida de 3.150€ para comparsas e disfraces de fóra do noso municipio”.
partida de 3.150€ para comparsas e disfraces de fóra de monforte
XOVES DE COMPADRES E XOVES DE COMADRES
Tanto para o concurso do Xoves de Compadres como para o de Comadres, a Concellería de Cultura de Monforte ten previstas tres convocatorias, dúas para colectivos e unha para opcións individuais. Unha delas para os centros de ensino, outra para parroquias, barrios e rúas do Concello e, por último, unha terceira de carácter individual Praza España. As solicitudes de inscrición para a participación nos concursos devanditos presentaranse no Rexistro Xeral do Concello de Monforte dende o día seguinte á súa publicación na páxina web do Concello, sendo o derradeiro día de inscrición o 4 de febreiro ás 14.00 horas no caso do Xoves de Compadres, e o 11 de febreiro ás 14.00 horas, para o Xoves de Comadres.
Os criterios que seguirá o xurado para determinar os gañadores e/ou gañadoras terán en conta a montaxe, a elaboración e os materiais empregados, a orixinalidade, a crítica social, o interese etnográfico, así como a calidade do compadre ou comadre. No relativo aos premios, tanto para Compadres como para Comadres, haberá 2 máis un áccesit por cada modalidade (colectivos, individuais) e 2 premios para a modalidade ‘Outros premios’ (etnografía, crítica social).
DESENVOLVEMENTO DO CONCURSO
Nas convocatorias de centros de ensino e individuais, todos os compadres/comadres inscritos concentraranse na Praza de España ás 17.30 horas. Despois de estar un tempo de exposición todos os participantes con ambiente festeiro e música, procederase a dar lectura dos premios –Concelleira de Cultura– e á queima das creacións na fogueira segundo a vontade de cada quen. Na convocatoria de parroquias, barrios e rúas do Concello, os compadres/comadres inscritos colocaranse nos lugares elixidos polos participantes dende primeira hora da mañá. O xurado visitaraos ata as 17.00 horas da tarde e lerá o resultado ao mesmo tempo que o da convocatoria de centros de ensino e individuais ao remate da concentración na Praza de España e antes da queima.
DESFILE DE COMPARSAS E DISFRACES / MARTES DE ENTROIDO
O día grande do Entroido en Monforte será o martes 17 de febreiro. O prazo de inscrición para participar no concurso do Desfile de comparsas e disfraces estará aberto no Rexistro do Concello, ou a través da Sede Electrónica do mesmo, ata o 13 de febreiro ás 14:00 h.
O Concello establece dúas modalidades claramente diferenciadas: unha delas para as comparsas e disfraces de Monforte de Lemos e outra para disfraces e comparsas de fóra do municipio. A partida destinada aos premios neste certame ascende a un máximo de 21.000€, dos que 17.850€ corresponden ao desfile de Comparsas e Disfraces de Monforte, e 3.150€ aos de fóra de Monforte.
O desfile comezará ás 17.00 horas na praza da Estación e percorrerá as rúas Calvo Sotelo, Roberto Baamonde, Cardeal Rodrigo de Castro e Praza da Compañía. O xurado cualificará as comparsas na praza da Estación de 16.00 a 17.00 horas. No caso dos disfraces individuais, concentraranse obrigatoriamente na praza da Estación ás 16.30 horas, para ser identificados polo xurado. Posteriormente, tanto as comparsas como os disfraces serán cualificados por lugares indeterminados do percorrido. Os criterios que seguirá o xurado para determinar os gañadores terán en conta a montaxe, a elaboración e os materiais utilizados, a orixinalidade e o interese etnográfico, o humor, a posta en escena e a utilización de música en vivo.
BASES E PREMIOS
As BASES ao detalle, así como a relación completa de premios, tanto para o Certame de Compadres e Comadres, como para o Desfile de Comparsas e Disfraces, pode consultarse na páxina web do Concello de Monforte.
