Dende o Clube Voleibol Ribeira Sacra felicitan a Yoraxi Melean pola medalla ao Mérito Deportivo concedida pola Xunta de Galicia a través da Secretaría Xeral para o Deporte. A entrega realizouse este mércores 29 de abril pola tarde no Centro de Convencións Palexco de A Coruña.
Dende o clube monfortino afirman que con esta medalla “recoñéceselle o traballo a prol do Voleibol Galego e monfortino, así como o seu percorrido pola Selección Española”.
TRAXECTORIA DE YORAXI MELEAN
Chegada a Galicia con 19 anos, e xa con traxectoria deportiva de compoñente da Selección Venezolana de Voleibol, formou parte da plantilla do Clube Pinguela –actualmente C.V. Ribeira Sacra– durante 7 anos. Aquí é onde obtén a nacionalidade española para formar posteriormente parte da Selección Española de Voleibol.
Na élite do voleibol pasou por equipos da máxima categoría en Italia, Portugal e España; participando en equipos como Tenerife, Logroño ou Menorca, equipos nos que conqueriu varias ligas, copas da raíña e participando tamén en competicións europeas.
Rematada a súa vida profesional asentouse definitivamente en Monforte onde asume a función de adestradora de varios equipos do Clube e actúa como técnica nos Campus de verán que organiza a Federación Española de Voleibol.
