Olimpia López, subdelegada do Goberno en Lugo, presidiu xunto ao alcalde, José Tomé, a Xunta Local de Seguridade convocada co obxectivo de coordinar o dispositivo de seguridade con motivo das festas patronais e o resto dos eventos que se celebrarán durante o verán.

O operativo previsto para garantir a seguridade durante as festas contará coa participación e coordinación da Policía Nacional, o subsector de Tráfico da Garda Civil, a Policía Autonómica, Protección Civil, bombeiros e a Policía Local. Aproveitando a ocasión, tamén se abordou a situación da seguridade cidadá no concello durante o pasado ano.

Olimpia López puxo en valor a cooperación entre administracións e o traballo coordinado das forzas e corpos de seguridade como elementos clave para garantir tanto a seguridade dos grandes eventos como a tranquilidade no día a día da cidadanía.