Esta fin de semana a capitalidade do Concello do Saviñao, Escairón, acolle a súa IV edición da Festa da Vendima cun espectacular programa de lecer e entretemento activo para acompañar a presenza das adegas da D.O. Ribeira Sacra presentes no evento vitivinícola.
O pregoeiro escollido para esta ocasión é Martín Alemparte, director da Axencia Galega de Calidade Alimentaria (AGACAL) e veciño da Ribeira Sacra con moita vinculación dende hai anos ao territorio e coñecedor da súa realidade socioeconómica.
Como nos anos anteriores, a organización busca darlle a este evento un sentido diferente ao do resto de Feiras do Viño, achegando ao público historia e tradicións arredor do viño e dun dos momentos máis importantes para os produtores e as adegas: a vendima. Deste xeito, esta fin de semana poderanse ver na Devesa pezas etnográficas únicas que “explican o pasado e presente a viticultura nas beiras do Miño e no conxunto da Ribeira Sacra”, grazas ao Ecomuseo de Arxeriz que trasladará alí algúns dos seus fondos.
Na liña anterior tamén se poderá gozar de diferentes obradoiros; dende uns de cata de uvas e de viño, pasando por outros relacionados coa cociña –da man da IXP Tenreira Galega– e outros relacionados con diferentes disciplinas de artesanía que fan posible Artesanía de Galicia.
No que respecta ás adegas participantes, estarán nesta Festa da Vendima: Adegas Moure, Pilares de Belesar, SAT Virxe dos Remedios, Galanteiro, Adega Goz e Adegas Lingua Loaira. Ademais destas, haberá postos de artesanía e de alimentación.
PROGRAMA
SÁBADO 6 DE SETEMBRO
- 11:00 horas. Apertura.
- 12:00 horas. Inauguración da “IV Festa da Vendima do Saviñao 2025”.
- 12:30 horas. Obradoiro de cata de uvas e de viño.
- 13:00 horas. Actuación do grupo Searas.
- 14:00 horas. Taller de cociña en vivo a cargo da IXP Tenreira Galega.
- 15:00 horas. Actuación do grupo Searas.
- 17:00 horas. Xogos tradicionais galegos.
- 17:30 horas. Actuación da Charanga KM 0.
- 18:30 horas. Actuacións musicais de Broken Peach e Budiño.
- 01:00 horas. Peche de stands.
DOMINGO 7 DE SETEMBRO
- 11:00 horas. Apertura de stands.
- 11:30 horas. Actuación do grupo de gaitas ‘Os Tarabelos do Saviñao’.
- 12:15 horas. Actuación de Marcos Valcárcel.
- 12:30 horas. Bendición das uvas e dos campos, e ‘Pisa Oficial’.
- 13:00 horas. Nomeamento de ‘Damas e Cabaleiros da Orde da Mencía’.
- 17:00 horas. Xogos tradicionais galegos e actuación da Charanga Louband.
- 18:00 horas. Actuacións do Grupo América de Vigo e Gin Toni’s.
- 00:00 horas. Peche de stands.
