O Presidente da Deputación de Lugo e responsable directo da área de Xestión Territorial, José Tomé Roca, anunciou este mércores o inicio das obras de mellora da estrada provincial LU-P-4102, que une Ferreira de Pantón con Escairón, nos concellos de Pantón e O Saviñao, respectivamente.
As actuacións, nas que a Deputación inviste máis de 145.000 euros, desenvolveranse entre os puntos quilométricos 3,7 e 6,1 -algo máis de dous quilómetros- comezaron hoxe con labores de limpeza nas cunetas.
A partir da próxima semana, estenderase o aglomerado en quente para, despois, instalar a nova sinalización horizontal e vertical.
Neste sentido, Tomé Roca remarcou que a estrada provincial é “unha vía de comunicación moi importante para os veciños e veciñas dos concellos da Ribeira Sacra, xa que conecta co centro urbano de Pantón e serve de acceso a servizos fundamentais da localidade, como o centro de día, a gardaría ou o tanatorio”.
O presidente da Deputación sinalou a importancia deste proxecto, “que forma parte do conxunto de actuacións que ten en marcha a institución na rede viaria provincial, a máis extensa de España, con 4.200 quilómetros”.
“Seguimos traballando nun dos nosos principais obxectivos, como é a mellora das comunicacións viarias, necesarias para aumentar a calidade de vida dos veciños e veciñas, e favorecer o reequilibrio territorial”, indicou a Deputación nun comunicado.
