O Alcalde de Pantón e mailo concelleiro de Economía, Empresa e Innovación da Xunta puxeron de manifesto na súa reunión a importancia da cooperación institucional para impulsar o tecido empresarial no concello. Así mesmo, avaliaron tamén novas vías de colaboración para seguir potenciando o emprendemento e os novos investimentos no municipio lucense.
Neste senso, fontes da Xunta informan que desde 2009 a Consellería vén apoiando ao Concello, empresas e veciños de Pantón con axudas por máis dun millón de euros, que permitiron mobilizar 2,5 millóns en eidos como o impulso ao sector comercial e á industria forestal, o apoio ás pemes ou no ámbito da mellora da subministración eléctrica e a eficiencia enerxética.
VANTAXES DE SER CONCELLO EMPRENDEDOR
O Concello de Pantón pode aproveitar, segundo indican tamén dende a Vicepresidencia segunda e Consellería de Economía, Empresa e Innovación, as vantaxes coas que contan os Concellos Emprendedores, unha figura creada polo Goberno autonómico coa colaboración da Federación Galega de Municipios e Provincias (Fegamp). Ser Concello Emprendedor implica que colaboran coa Administración galega na captación de novos investimentos para Galicia, contribuíndo a alcanzar tres grandes retos: máis simplificación administrativa, máis facilidades de acceso a solo industrial, e máis incentivos fiscais.
Outro retorno ou vantaxe desta iniciativa para os denominados “Concellos Emprendedores” é que teñen prioridade en convocatorias de ordes de axudas da Xunta de Galicia dirixidas, por exemplo, á mellora dos parques empresariais, á posta en marcha de viveiros industriais ou o impulso da biomasa. Deste xeito, contribúese tamén á creación de emprego.
