A Federación Galega de Dano Cerebral (FEGADACE) e Afundación colaboran na organización dunha xeira de charlas para a sensibilización arredor do dano cerebral adquirido, unha discapacidade provocada fundamentalmente por ictus e traumatismos cranioencefálicos que afecta a unhas 36.000 persoas en toda Galicia.

Trala boa acollida de público da edición pasada, ambas entidades volven sumar forzas coa programación de 10 sesións informativas sobre a casuística, dimensión e prevención do dano cerebral que se realizarán en diferentes vilas e cidades galegas.

En Monforte, a sesión será o mércores 18 de outubro ás 18.15h no Espazo+60 de Afundación (Rúa Cardeal Rodrigo de Castro, 18,). Está dirixida a un dos colectivos de risco, as persoas maiores, polo que o seu contido centrarase na promoción de hábitos saudables, na detección de signos e síntomas de alarma e nas pautas de actuación en caso de sufrir dano cerebral, prestando especial atención ao ictus, primeira causa de discapacidade adquirida en España.

DÍA DO DANO CEREBRAL

A actividade enmárcase na programación informativa e divulgativa que a Federación Galega do Dano Cerebral desenvolve con motivo do Día Nacional do Dano Cerebral que se celebra o 26 de outubro.

O obxectivo das charlas é contribuír a loitar contra o descoñecemento e axudar na prevención desta súbita lesión cerebral que adoita considerarse unha “epidemia silenciosa” pola dificultade para detectar as súas secuelas.

FEGADACE, ademais do apoio de Afundación, conta con financiamento da Consellería de Política Social dentro dos programas con cargo á asignación tributaria do 0,7% do IRPF.

INSCRICIÓNS PARA PARTICIPAR

As sesións están dirixidas a persoas de máis de 50 anos e, aínda que a asistencia é de balde, é preciso inscribirse previamente da seguinte maneira:

• As persoas socias do Espazo+60 de Afundación poden anotarse no local da Rúa Cardeal de Monforte de Lemos.
• As persoas que non son socias poden cubrir un formulario de inscrición online, ou chamar ao teléfono 881 943148.