Nesta situación e ante as últimas protestas a resposta desde a xerencia foi que se está a agardar pola resolución e adxudicación das prazas de méritos ofertadas polo SERGAS hai xa máis dun ano. Mentres tanto a situación “segue prácticamente igual no Centro de Saúde de Monforte e no Hospital, e segue a empeorar nos concellos da contorna.” Nos últimos meses engádense os casos de Chantada e Bóveda.

No concello de Chantada levan dende antes do verán con falta de facultativos. Dun cupo de 7 médicos e un pediatra, “agora mesmo soamente 2 ou 3 médicos atenden a unha poboación de máis de 8000 habitantes repartidos en núcleos moi afastados; e por suposto, sen pediatra e ningún sustituto a maior parte das veces. De feito, durante o Nadal quedaran só dous médicos para atender casi exclusivamente urxencias.”

Pladesapu lembra tamén a situación do concello de Bóveda, “o seu Centro de Saúde leva sen médico xa varios meses sendo o médico que atende no consultorio de Rubián, o encargado de cubrir as necesidades dos habitantes das dúas zonas, media mañá en Rubián e media mañá en Bóveda a maiores das urxencias que poidan aparecer.” Lamentan que debido ás vacacións do único médico titular, o centro de saúde de Bóveda queda estes días sen facultativo, “xa que o médico sustituto só cubre o consultorio de Rubián”.

Nesta situación Pladesapu esixe tanto á Xerencia de Atencion Primaria como á do Hospital Comarcal que cubran os ocos vacantes dos facultativos como é debido, sen deixar núcleos sen atención médica durante semanas.