Aseguran desde o Comité que as deficiencias na subministración afectan a produtos básicos necesarios para o funcionamento diario, tales coma vendas, “que non chegan malia ser pedidas polo persoal dos centros en tempo e forma, tanto no programa habilitado para realizar pedidos ordinarios e urxentes, coma nos correos que se envían á unidade de subministros, e sempre seguindo os protocolos que desde ese servizo ten establecidos”.
Denuncian que materiais indispensables para garantir a seguridade e cumplir cos protocolos de prevención de infeccións, tales coma guantes estériles, máscaras FFP2 e panos estériles, entre outros, “son enviados en cantidades absolutamente ridículas o que provoca que os centros queden sen existencias nos primeiros días tras recibir os pedidos e tendo que agardar ata a seguinte remesa, que no mellor dos casos se produce aos quince días”. Asegura que tampouco se conta con materiais especiais para as curas de determinados pacientes, “coa conseguinte incidencia na calidade da asistencia sanitaria e a frustración do persoal sanitario, que non pode dar os coidados que ese paciente precisa especificamente”. Á falta de subministración do material sanitario engaden a falta do material administrativo.
O comité tamén denuncia prácticas que se están a levar desde a unidade de subministros, “remítense os albaráns cos pedidos manipulados e falseados, igualando as cantidades servidas coas cantidades pedidas polo persoal reducindo ata onde convén e faltando ao respecto aos trablladores que fan solicitudes de material segundo as necesidades asistenciais, censurando e poñendo en entredito o seu rigor e a súa capacidade como profesionais sanitarios.”
Con todo, o Comité de Centros de Atención Primaria esixe á Xerencia que tome medidas de xeito inmediato para solucionar estas deficiencias que poñen en perigo a calidade da asistencia sanitaria máis básica, afectando directamente á saúde e benestar das persoas e ao bo funcionamento dos centros sanitarios de Primaria. Esixen tamén restablecer un servizo de subministracións de calidade e segundo as necesidades de cada centro.
